Jieštipšomohjelm

Ulmuin láá huámášittee iäruh streesikierdâmnaavcâst, já lii pyeri oppâđ aiccâđ jieijâs raajijd. Jis tun huámášah, et kiävtáh liijkás ennuv ääigi vyeimivaarij kulâtteijee aššijd, te kannat tarkkuđ aargâ já kiddiđ huámášume ääigi kevttim täsitiädun.

Jis elimist ij lah tuárvi äigi tuoibâmân já muásudâtmân, te čuávumuššân puáhtá leđe ovdâmerkkân

• mielâtile vuálánem, erdumvuotâ já vaibâmvuotâ
• muštovädisvuođah já vuájudâttâmnaavcâ hiäjusmem
• lijgemiäráliih huolah tâi atâštâs
• algâttemnaavcâ kiäppánem
• mielâkiddiivâšvuođâ váilum ovdeláá suotâsin aiccum aššijd

Tuđâtteijee porgâm

Mii peri porgâmušâid ij lah tuđâtteijee. Maŋgâsist lii vuáttámuš tast, et veikkâ lii luhostum vyelgiđ olgos, pieijâđ tiiskâid mašinân já eelliđ käävpist, te vajo ij lah puáránâm. Mielâtile pyereed taggaar porgâmuš, mii lii tuđâtteijee tâi mast ana jieijâs čeppin.

Lii tehálâš usâškyettiđ maasâd monâttum tooimâid, moh ovdeláá láá pyevtittâm pyeri vajo. Lii pyeri meid kavnâđ aaibâs uđđâ aašijd, moh pyevtitteh pyeri vajo.

Inspiristuu iärásij feeriimijn

Ovdil taam siijđo hundâruššâmpargo tun puávtáh keččâđ čuávuváá video (2:45). Videost šlundevuođâ feerim ulmuuh muštâleh ovdâmeerhâid aašijn já porgâmušâin, main sij navdâšeh já finnejeh vuoimijd aargâst.

Ohtâ onnâ lii vuáváđ tuđâtteijee rijjâääigi porgâmuš muuneeld, vâi tot vissásubbooht olášuuččij.

Mii puáhtá eidu tunjin ilo?

Lii uáli persovnlâš, mast kii-uv naavdâš. Nuuvtpa lii-uv tehálâš, et tun tiäđáh, moh aašijd pyevtitteh ilo eidu tunjin. Pyerimielârájulisto kannat pieijâđ uáinojeijee sajan, tego jieŋâskaapi uuksân.

Smietâ meid, et lasetteh-uv tuu valjim ääših pyereestvaijeem meid kuhes ääigi uáinust. Jis lii sillum, te sáttá leđe heerkib sorduđ háitulijd huáppučuávdusáid. Ovdâmerkkân lohđuttâspuurrâm, alkohol, uhkespellâm tâi neetist surffam pyehtih uánihisáigásávt pyerediđ vajo mut leđe kuhheeb ääigi uáinust háituliih.

Suotâs aašij kavnâm lii távjá älkkeb ko lii tuđâváá mielâtiileest.