Skip to main content

Jieštipšomohjelm

Tiervâpuáttim šlundevuođâ jieštipšomohjelmân!

Lah-uv šlundáá já vaibâm? Oro-uv et ääših iä pyevtit siämmáánáál pyeri mielâ ko ovdil? Šlundevuođâ jieštipšomohjelmist tun finniih tiäđu šlundevuođâst já išepiergâsijd ton pyereedmân.

Lii-uv taat jieštipšomohjelm muu várás?

Šlundevuođâ jieštipšomohjelm suápá puohháid, kiäin láá šlundevuotâtavdâmeerhah. Tágáreh láá ovdâmerkkân mielâtile koččâm, pyeri mielâ monâttem, algâttemnavcâttesvuotâ, vuáđustâlhánnáá sujâlâšvuođâ tobdoh sehe jiešluáttámuš tâi jiešárvustem monâttem.

Taat jieštipšomohjelm lii läivis já koskâváduhis tavdâmeerhâi várás. Tust ij taarbâš leđe diagnoos.

Tun puávtáh kevttiđ šlundevuođâ jieštipšomohjelm

  • 24/7
  • nuuvtá
  • avveest sorjohánnáá
  • nomâttemmeeht já čáládâthánnáá
  • tast sorjohánnáá, et lii-uv diagnoos vâi ij
  • jiečânávt tâi eres tipšo ooleest
  • čođâlditmáin ubâ ohjelm tâi valjiimáin tuše olssâd pyeremustáá heivejeijee oosijd

Mii ulmen lii, et tiäđuh já iše láá finnimnáál puohháid jotelávt, juvsâttetteht já vyeligis kozzâšáin.

Nuorâi várás kávnoo jieijâs jieštipšomohjelm šlundevuođâ vuástá.

Ohjelm čoggâšuvá čuávuváin oosijn

1. MAST LII KOČČÂMUŠ?

Vuossâmuu uásist tun finniih tiäđu šlundevuođâst. Tun oopah, et mii iššeed já mii viäránit tile.

Koijâdâllâm vievâst tun puávtáh árvuštâllâđ, et mon tääsist tuu šlundevuotâ lii.

Tun oopah tubdâđ tavdâmeerhâid sehe tahheid, moh šoddâdeh já paijeentuálih taid.

Äššitobdeevideoh muštâleh iärrás lasseen

  • kuás koččâmuš lii šlundevuođâst
  • mast šlundevuotâ puáhtá šoddâđ
  • jiešhiävulijn jurduin
  • šlundevuođâst tuoibâmist

Ton lasseen šlundevuođâ feerim ulmuuh muštâleh videoin tast, et magarin šlundevuotâ oro já maht tast puáhtá tuoibâđ.

2. TYEJIPIERGÂSEH

Hárjuttâsah láá ohjelm vááimus. Toi peht tun peesah karttiđ já smiettâđ čuávdusijd jieijâd tilán.

Tun oopah vuovijd, moiguin lii máhđulâš haldâšiđ šlundevuođâ tavdâmeerhâid pyerebeht.

Hárjuttâsâi vievâst tun puávtáh tutkâđ jurduidâd já toimâmmalijdâd.

Tun puávtáh oppâđ ovdâmerkkân

  • hästiđ háitulijd jurdâččem- já toimâmvuovijd
  • haldâšiđ jieijâd aargâ já vuáváđ toimâidâd pyerebeht
  • muásudâttâđ
  • kavnâđ merhâšume jieijâd elimân

Tun rááhtáh meid vuávám tađe várás, jis šlundevuotâ uđâsmuvá tâi viärrán.

Äššitobdee muštâl videoin, et maht mielâtiervâsvuođâ puáhtá nanodiđ aargâst já maht šlundevuođâ viärráás riäggá puáhtá potkiđ.

Ton lasseen šlundevuođâ feerim ulmuuh muštâleh hárjuttâsâin, moh láá išedâm sii.

3. EVVISEH JOOĐHÂ VÁRÁS

Majemuu uásist tun sihtiih mielâ puátteevuođâ kuávlun.

Tun árvuštâlah koijâdâllâm vievâst, et maggaar vajo tust lii jieštipšomohjelm maŋa.

Tun finniih lasetiäđuid tast, et aargâ haldâšem já täsitiädulâš eellim vaigutteh mielâtiervâsvuotân. Tun oopah paijeentoollâđ puátusijd, maid lah juksâm.

Tun finniih meid tiäđu tast, et kost tun puávtáh táárbu mield finniđ iše.

Čuávuváá videost (1:34) tun kuulah tärhibeht jieštipšomohjelm ráhtusist. Tun finniih meid tiäđu tast, et maht jieštipšomohjelm hárjuttâsah já tuávááštiätu pyehtih pyerediđ tuu vajo.

Mii lii jieštipšomohjelm?

  • vuáđuduvá tutkum toimâmvuovvijd, moh láá aiccum pehtilin tipšoost
  • čoggâšuvá kuulmâ uásist
  • siskeeld tiäđuid já hárjuttâsâid, moh išedeh aargâst já tavdâmeerhâi haaldâšmist

Taat lii meid áámmátlii tyejipiergâs

Taam puáhtá kevttiđ olesvuottân tâi oosij mield juávhui tâi ohtâgâsteivâmij toorjân.

Áámmátlâš puáhtá tuárjuđ já stivriđ hárjuttâsâi porgâmist. Jieštipšomohjelm čoođâ moonnâm ääigi láá teivâmeh táválávt 1–3 kerd. Toi ääigi puáhtá ovdâmerkkân savâstâllâđ hárjuttâsâi pajedem jurduin já smiettâđ, et moh hárjuttâsâid lijjii hiäivulumoseh.

Huám!

Jis arvâlah, et tuu tavdâmeerhah láá váduheh, te ele iäpádâl ton lasseen uuccâđ iše!

Muštolisto algâttem várás

Kost peri, kuás peri

Jieštipšomohjelm lii tunjin finnimnáál ain, ko tust lii asto, já materialijd tun peesah keččâđ mon tijmeääigi peri saajeest sorjohánnáá. Vieti veikkâ kähvipuudâ kukkosii purdo tiätumaašin piällást já njoomâ tiäđu fáádást.

Aktivlâš hárjuttâllâm puáhtá puátusijd

Uđđâ tyejipiergâsij oppâmist ovttuu juátkojeijee hárjuttâllâm lii tehálâš. Ko tun hárjuttâlah tyejipiergâsij kevttim vistig älkkees tilálâšvuođâin, te toh išedeh tuu kuuloold meid váduhub tilálâšvuođâin, main tobdoh láá väldimin oles vääldi.

Tuu priivaatvuođâ suojâlem tiet koijâdâlmij já hárjuttâsâi vástádâsah iä vyerkkejuu. Jis halijdah taid vuárkán, te kopijist taid olssâd sierânâs tiätuvuárkán.

Tust lii máhđulâšvuotâ nubástusân

Tun lah forgâ aalgâtmin jieštipšomohjelm. Pyeri, et tun tooimah jieijâd pyerrin. Jieštipšomohjelm iššeed tuu taggaar eellim kuávlun, mon tun jieš halijdah.

Lii táválâš, jis hárjuttâsah oroh koskâttuvâi hastâleijen. Tot kulá áášán, ko tun viigah olášuttiđ pisováid nubástusâid. Nuuvtpa puávtáh leđe olssâd ármulâš. Oovded ohjelm mudágis pitáh häävild, já toolâ puudâid, vâi tuu vyeimih mäccih.